ກົມການຄ້າພາຍໃນ (ຂຽນຫຍໍ້ວ່າ: “ກຄພນ”; ພາສາອັງກິດ: Department of Internal Trade, ຂຽນຫຍໍ້ວ່າ: “DOIT”) ແມ່ນກົງຈັກໜຶ່ງຂອງກະຊວງອຸດສາຫະກໍາ ແລະ ການຄ້າ ທີ່ມີພາລະບົດບາດເປັນເສນາທິການໃຫ້ກະຊວງ ໃນວຽກງານການຄຸ້ມຄອງ ແລະ ສົ່ງເສີມຕະຫຼາດ ແລະ ການຈຳໜ່າຍສິນຄ້າ ແລະ ບໍລິການ; ທຸລະກິດນ້ຳມັນເຊື້ອໄຟ ແລະ ອາຍແກ໊ສ; ການຄ້າທາງເອເລັກໂຕຣນິກ; ລາຄາສິນຄ້າ ແລະ ບໍລິການ; ກຸ່ມ ແລະ ສະຫະກອນການຄ້າ, ສະພາການຄ້າຕ່າງປະເທດ ປະຈໍາ ສປປ ລາວ; ການຊຸກຍູ້ ແລະ ສົ່ງເສີມການແຂ່ງຂັນທາງທຸລະກິດ; ການປົກປ້ອງສິດຜົນປະໂຫຍດຂອງຜູ້ຊົມໃຊ້; ວຽກງານກວດກາການຄ້າ; ການລະເມິດນິຕິກຳທີ່ຕິດພັນກັບການຄ້າ ແລະ ຂໍ້ຂັດແຍ່ງທາງດ້ານການຄ້າ ໃນບັນຫາທີ່ຕິດພັນກັບພາລະບົດບາດຂອງກົມ ໃນຂອບເຂດທົ່ວປະເທດ ຊື່ງສາມາດຈັດເປັນກຸ່ມວຽກດັ່ງນີ້:

• ກຸ່ມວຽກຄຸ້ມຄອງຕະຫຼາດ ແລະ ການຈຳໜ່າຍ ເປັນຕົ້ນ ຄຸ້ມຄອງສູນການຄ້າ, ຮ້ານສັບພະສິນຄ້າ, ທຸລະກິດຂາຍຍົກ-ຂາຍຍ່ອຍ, ທຸລະກິດຂາຍກົງ, ສະຫະກອນການຄ້າ; ຄົ້ນຄວ້າການອອກ/ຕໍ່/ລົບລ້າງໃບອະນຸຍາດ.
• ກຸ່ມວຽກຄຸ້ມຄອງການຄ້າທາງດີຈີຕ໋ອນ ເປັນຕົ້ນ ຄຸ້ມຄອງ, ສົ່ງເສີມ ແລະ ພັດທະນາການຄ້າທາງເອເລັກໂຕຣນິກ (E-commerce) ໃຫ້ທັນສະໄໝ; ອອກໃບຢັ້ງຢືນ/ອະນຸຍາດ; ແກ້ໄຂຂໍ້ຂັດແຍ່ງ ແລະ ປະຕິບັດມາດຕະການຕໍ່ຜູ້ລະເມີດ.
• ກຸ່ມວຽກຄຸ້ມຄອງລາຄາສິນຄ້າ ແລະ ບໍລິການ ເປັນຕົ້ນ ຄົ້ນຄວ້າສະເໜີ ເພີ່ມ/ຫຼຸດ ບັນຊີສິນຄ້າຄວບຄຸມລາຄາ (ບັນຊີ ກ) ແລະ ຕິດຕາມລາຄາ (ບັນຊີ ຂ); ວິເຄາະສະພາບການສະໜອງ-ຄວາມຕ້ອງການ; ຄຸ້ມຄອງຄັງແຮເຂົ້າ.
• ກຸ່ມວຽກຄຸ້ມຄອງນໍ້າມັນເຊື້ອໄຟ ແລະ ອາຍແກ໊ສ ເປັນຕົ້ນ ຄົ້ນຄວ້າໂຄງສ້າງລາຄາ ແລະ ກຳນົດລາຄານ້ຳມັນ/ອາຍແກ໊ສ ໃຫ້ສອດຄ່ອງກັບກົນໄກຕະຫຼາດ; ອອກອະນຸຍາດສ້າງຕັ້ງ/ດຳເນີນທຸລະກິດ; ບໍລິຫານກອງທຶນນ້ຳມັນເຊື້ອໄຟ; ຕ້ານການລະເມີດກົດໝາຍ.
• ກຸ່ມວຽກແຂ່ງຂັນທາງທຸລະກິດ ເປັນຕົ້ນ ຜັນຂະຫຍາຍນະໂຍບາຍ ແລະ ກົດໝາຍ; ເປັນກອງເລຂາຄະນະກຳມະການສົ່ງເສີມການແຂ່ງຂັນທາງທຸລະກິດ; ສະເໜີມາດຕະການປັບໃໝຕໍ່ກັບພຶດຕິກຳທີ່ຈຳກັດການແຂ່ງຂັນ.
• ກຸ່ມວຽກປົກປ້ອງຜູ້ຊົມໃຊ້ ເປັນຕົ້ນ ຕິດຕາມ, ຄຸ້ມຄອງສະມາຄົມປົກປ້ອງຜູ້ຊົມໃຊ້; ກວດກາເນື້ອໃນການໂຄສະນາ, ສະຫຼາກສິນຄ້າພາສາລາວ; ຮັບ ແລະ ແກ້ໄຂຄຳຮ້ອງທຸກຜ່ານສາຍດ່ວນ 1510 ແລະ ສື່ສັງຄົມອອນລາຍ.
• ກຸ່ມວຽກຄຸ້ມຄອງວຽກງານກວດກາການຄ້າ ເປັນຕົ້ນ ຄົ້ນຄວ້າມາດຕະຖານແຕ່ງຕັ້ງພະນັກງານກວດກາການຄ້າ; ເຄື່ອນໄຫວຕິດຕາມ, ຕ້ານ ແລະ ສະກັດກັ້ນການຄ້າທີ່ຜິດກົດໝາຍ, ສິນຄ້ານອກລະບົບ ແລະ ທຸລະກິດທີ່ບໍ່ມີໃບອະນຸຍາດ.